about 台灣麻雀

台灣麻雀新地盤

2008-06-25T12:46:00.003+08:00

原先個「about台灣麻雀」網頁反應奇慢，成日都Load唔到，終於的起心肝，將佢搬過黎Blogger。

響舊網頁既回應部分，多得各網友查詢支持，填補左原來未清楚及不足之處，所以舊網頁暫時都會保留，有興趣可參閱。待有閒暇，先至再搬埋ｄ回應內容過黎啦！

台灣麻雀基本玩法

2005-10-18T23:34:00.001+08:00

爛賭朋友想學打台灣麻雀，要小弟簡介其打法，想又可有多一兩後備腳，故聽命另闢「about台灣麻雀」新頁。小弟學習台灣麻雀之日子尚淺，當中如有錯漏或不清楚之處，萬望見諒及指正。

《台灣麻雀基本玩法》

正所謂規矩係人定嘅，「各處鄉村各處例」，提供之玩法，只作為參考，最好事先大家了解玩法同計番方法，若玩法有異，互相協調一下，免傷和氣。

* 遊戲開始，先擲骰定東位，坐緊東果位人兄再擲骰抽東南西北，抽到東坐響之前骰定嘅東位，如此類推。

* 台灣麻雀連八隻花共一百四十四隻牌；砌牌時，只需將牌砌成前後兩排，有別於廣東麻雀，將牌砌成上下兩層；摸牌先內後外。

* 起手時，擲骰摸牌，每次四隻，摸牌每位至十六隻牌時，東位多摸一隻「頭牌」，共有十七隻牌，其他三家有十六隻牌。一如廣東麻雀，按次序補花，然後東位打牌。

* 一般以言，食胡時應有十七隻牌，即五簡牌（三隻順序上牌，或三隻相同的碰牌）及一對眼。

* 食胡不論打出或自摸，不得將胡牌插入牌列之內。

* 摸和臨庄。

* 頭四圈打完，東南位、西北位互調，食尾胡者擲骰定東位，東位擲骰起庄；後四圈打完，再重新執位。

* * * * * * * * * * * * * * * * * *

番數算法

2005-10-18T23:33:00.004+08:00

* 開始時，玩家先決定幾多錢一個底，幾多錢一番。

例：十蚊一個底，一蚊一番；若某某自摸十六番牌，位位輸廿六蚊（$10+$1×16）。

* 台灣麻雀食胡毋須立即交收，輸的數目先放於自己位，若先前一鋪羸家再食輸家，輸家先多輸前一鋪數目的百分之五十，再計羸家再食輸家之數目。謂之「拉」。

* 反之，輸家反過來食番先前羸家，則輸家可少付輸前累積數目的百分之五十，即可以交收。

* 若先前羸家繼續羸，但食另一家，則所有輸家仍然毋須交收，直至有其他一家食胡，方需要交收。

跟上述例子，某某做莊自摸十六番，位位需先放廿六蚊於自己位；若某某再自摸十番，則位位需先加十三蚊，然後再多輸廿蚊，共五十九蚊。如果某某出衝給某丙，某丙只需付某某廿八個半；而另外兩家亦同時結算，各付某某五十九蚊。

* * * * * * * * * * * * * * * * * *

組合實例及番數

2005-10-18T07:44:00.052+08:00

詳細組合名稱、實例及番數，表列如下。

(再按：緊記麻雀耍樂是也，不宜大賭；「各處鄉村各處例」，玩法有異時，自己人互相協調一下，免傷和氣。)

名稱	簡介及實例	番數
圍骰	每人即付擲圍骰者	1個底
四隻在檯	第一個打出即付其他人	1個底
字	中發白，正圈，正位各多加1番	1
花	每隻花一番，正位多加1番	1
無字		1
無花		1
無花無花		8

獨獨	單叫，偏章，卡窿	2
假獨		1
將眼	二五八眼	2
對碰		2

缺一門	無番子，只由筒、索、萬其中兩種花色組成	5
斷么九		5
大五門齊	由筒、索、萬、風牌及三元組成，每種花色均有一簡	10
小五門齊	由筒、索、萬、風牌及三元組成，其一花色只有一對	15

自摸		1
門清		5
一摸八	自摸門清不求人	8

平糊		5
無字無花大平糊		15
大雞糊	不計花（有花或無花），０番牌	10
哩咕哩咕	八對半	40
哩咕哩咕叫八飛		50
哩咕哩咕(內有一款四隻)		50
哩咕哩咕(內有兩款四隻)		60

兩暗簡		5
三暗簡		10
四暗簡		20
五暗簡		30
簡簡糊	不得開槓	80

混一色		30
清一色		80
對對糊		30
全字對對糊		100
花么九		30
全么九		100
十三么	十三么加一簡，只可門清	100
十三么 (全么九)		120
十六不搭		50
小三元		30
大三元		60
小三風	牌面有兩簡風牌碰牌，以及一對風牌	20
大三風	牌面有三簡風牌碰牌	40
小四喜		80
大四喜		100

全求人		15
半求人		7
海底撈月		5
一般高	兩簡同花色同數字之上牌	5
雙般高	兩手一般高	10
太般高	三簡同花色同數字之上牌	15
姊妹	兩簡不同花色相碰牌或同數字之上牌	2
三相逄	三簡筒索萬相碰牌或同數字之上牌	10

清龍(明)	三簡由一到九的數字，由一門花色組成	10
清龍(暗)	清龍，三簡均為暗簡	15
雜龍(明)	三簡由一到九的筒、索、萬組成之上牌	15
雜龍(暗)	雜龍，三簡均為暗簡	20
雙雜龍(明)		35
雙雜龍(暗)		50

四歸一	四隻在手	5
四歸二	四隻在手，兩隻為眼，兩隻上章	10
雙四歸一		15
老少	同花色上牌123及789，或碰牌111及999	5
雙老少		5
半老少	123/789或111/999，加一對番子	15
全老少	123/789或111/999，加一對么九	30

一台花	每人即付	1個底
八隻花(即食糊)		40
天糊		100
地糊		100
三子內	三隻內食糊	30
七子內	七隻內食糊	20
十子內	十隻內食糊	10

詐糊	牌局繼續，詐糊者隨摸隨打，即賠每人	20
叫錯碰	即付每人	1個底
明槓		1
暗槓	每人即付1個底，食胡計2番	2
暗槓忘記出示	即付每人2個底	2個底
搶槓	當出牌者出沖	1
槓上槓		40
槓上槓又槓		80
捕花槓		1
庄		1
臨庄(連一)		3
臨庄(連二)		5
臨庄(連三)		7

回應補充：十六不搭

2005-10-18T02:10:00.003+08:00

Sam: 何謂[十六不搭]? (2005.11.18)　

「十六不搭」者，與「十三么」類同。

十六隻牌包括「東南西北中發白」，跟「筒索萬」各三隻，加十六隻牌其中一隻成一對，而三隻「筒索萬」必須不可能構成一簡；如：一四七萬、一五九索、二六九萬等。

如以上述例子：東南西北中發白、一四七萬、一五九索、二六九萬，即叫十六飛。

May: 唔好意思,再多一個問題,請問十六不搭裡,三簡筒索萬的不搭,是否不可1,3,5?若不可,點解?麻煩了,謝謝. (2006.07.27)　

至於十六不搭，若有1同3，搭2即成一簡，同理，有3同5，搭4即成一簡，故此並非不搭。

回應補充：十三么

2005-10-18T02:09:00.000+08:00

johnny: 十三么台灣麻雀有沒有搶暗摃 ? (2005.12.31)　

行就行ｄ，都係「各處鄉村各處例」。我地打開十三么就冇搶暗摃。

兼且，我地仲係打開：叫十三么、邊家有、邊家輸。即係話，若然你叫足十三飛，邊家有番子么九都即輸；當然，已經碰出、上左、見光唔計數啦。

alice: 請問十三么是不是要門清，即不可上牌或碰牌? (2006.02.14)

有關十三么，是要門清的，見前面回應。

alice: 唔好意思!請問你知唔知打廣東牌如果兩家一齊食十三么,有冇截糊,如果冇,出沖者是不是要付兩家錢? (2006.02.15)

經查詢多位雀友，雀友確認十三么理應冇得截糊，但若然真係咁邪門，兩家十三么都係叫果隻，抵死啦！抵截糊啦！當然，如果打一炮三響就大家高興啦！

芭芭拉：想請問叫糊13么是叫其他非么九牌,如68索,叫卡窿7索,可否搶別家的7索暗槓,請賜教. (2007.01.23)

見前面回應。

回應補充：全求人/半求人

2005-10-18T01:48:00.002+08:00

jim: 咩係全求人 / 半求人?(2006.03.26)

阿Jim果然細心，小弟漏了解釋全求人及半求人。
當全手牌都係見光（全部係上左或碰出），即連食胡對眼都係（靠人）打出，謂之全求人。
至於半求人，即全手牌都係見光，除左食胡對眼係自摸既。

回應補充：假獨

2005-10-18T01:44:00.001+08:00

alice: 請問什麼叫假獨? (2006.02.15)　

假獨者，即糊牌似是單釣，而實際上並非單釣。舉例：
４５６７萬，若食７萬時，４５６萬一簡，似是單釣７萬做眼，實則叫４７萬。

回應補充：雜龍

2005-10-18T01:40:00.012+08:00

Jason: 清龍少番過雜龍??? (2006.05.08)　

我地打開清龍係少番過雜龍…雜龍幾難做架。

May:怎樣為雙雜龍?明雙雜龍多少番?暗雙雜龍多少番? (2006.07.21)

雙雜龍…例子：

(a) 123筒 + 456索 + 789萬 + 123筒 + 456索 + 對眼；即可看作

123筒 + 456索 \
.　　　　　　　　} + 789萬 + 對眼
123筒 + 456索 /

(b) 123筒 + 456索 + 789萬 + 123萬 + 789筒 + 對眼；即可看作

123筒　\　　　　　　　/ 789萬
.　　　　} + 456索 + {　　　　 + 對眼
123萬　/　　　　　　　\ 789筒

(c) 123筒 + 456索 + 789萬 + 456萬 + 789索 + 對眼；即可看作

.　　　　　/ 456索 + 789萬
123筒 + {　　　　　　　　 + 對眼
.　　　　　\ 456萬 + 789索

Okay!?

Marlan: 需然話「各處鄉村各處例」, 但無理由雜龍番數(15)多個清龍(10), 唔make sense!! (2006.11.16)

冇要緊，同自己友打牌，志在耍樂，唔歡喜咪改lor。
不過，做清龍，可能容易轉缺一門或混一色；但係，硬做雜龍變化少左，查實都唔易架！

回應補充：一牌兩食

2005-10-18T01:36:00.002+08:00

蕉: 魔鬼問題：萬子112233445566777 多少番？(2006.03.18)　

至於萬子112233445566777，笨蕉公司冇野做，好得閒呀！小相公呀！！

蕉: 唔好意思，真係幾得閒。補充上次問題，應該有多兩隻8萬。(2006.03.29)　

各位看倌，蕉兄所舉之例子，委實用心良苦，此例子為「一牌兩食」，即有兩種食胡牌形：1)哩咕哩咕及2)雞胡。

1) 11 22 33 44 55 66 777 88
2) 123 123 456 456 777 88

我地若打「一牌兩食」，則計兩種牌形總番數，都好大下！
至於幾多番，阿蕉，咪玩野！自己計啦！

回應補充：其他

2005-10-18T01:35:00.005+08:00

RC: 假如我有一組筒子123456789，一簡索子456及一簡萬子789，全部無碰。這個怎樣計法？有多少條龍？ (2006.01.10)

以我地打開計數：

筒子123456789，一條清龍。
筒子123、索子456、萬子789，一條雜龍

至於清龍／雜龍是否暗龍，看三簡是否全是暗簡而定。

＊　　　＊　　　＊　　　＊　　　＊　　　＊　　　＊

bb: 請問詐糊點賠?何謂詐糊?有咩例?斷橋或上牌或忘記放中間是否即詐? (2006.02.13)

詐糊者：
－　叫食而又食不出；
－　又或可以食糊，而沒有食糊，但同一圈之內，食糊另一家，亦作詐糊；
　　例如，叫吃２５８筒，下家打２筒沒有吃，到上家打８筒，叫吃，作詐糊。

跟上表，詐糊者賠每家二十番。

至於斷橋或上牌或忘記放中間，我地自己人耍樂，免傷和氣，沒有如此嚴格。

＊　　　＊　　　＊　　　＊　　　＊　　　＊　　　＊

alice: 對不起!問題多多!我巳知道什麼是雙雜龍了,但還是不知道什麼是假獨及斷橋? (2006.02.15)

食胡開牌時整散了手牌，為之斷橋，斷橋者不可食胡，又或者要過一圈後方可再食胡。又係果句，規矩人定，最緊要大家玩得開心。

＊　　　＊　　　＊　　　＊　　　＊　　　＊　　　＊

Gerrard: 我想問：123萬加 456萬就叫姊妹 la! 咁如果 123萬加 456筒, or 456萬加 789索, 咁算唔算姊妹? 另外, 有人一台花, 每人俾左一底之後, 如果0個個人食糊, 咁佢手上的一台花仲可唔可以計番? 如果可以, 係計幾多番?? Thanks! (2006.03.09)

至於Gerrard既問題…可能小弟寫得唔清楚又或者玩法有別，姊妹者…兩簡相同上牌或碰牌，但唔同花式，舉例：123萬加123筒，又666萬加666筒索。

而收左一台花每人一個底之後，又食糊，我地打開一台花計7番。

＊　　　＊　　　＊　　　＊　　　＊　　　＊　　　＊

蕉: 我有一個唔好的經歷，開牌閒家有花，補花後吃花胡，算唔算天胡？ (2006.03.17)

開牌補牌食胡，如：開槓自摩，補花食胡，都唔算天胡！
對於你既不幸經歷，重要計錯番…深表…

＊　　　＊　　　＊　　　＊　　　＊　　　＊　　　＊

jim: 請問以下有幾多番，點計？44(筒) 789 (筒) 123456789 (索) 79(萬)
最終食8萬win，remark: 無花門清，係下家打出 (2006.03.26)

44(筒) 789 (筒) 123456789 (索) 79(萬)，食8萬
之但係…邊個做莊？有冇拉莊？第幾隻打出呢？

jim: 下家做莊(打出). 無拉. 打左好耐(唔係10隻內) thanks (2006.03.26)

44(筒) 789 (筒) 123456789 (索) 79(萬)，食8萬
下家做莊(打出)，無拉，唔係10隻內)

無字花大平胡　１５番
門清　　　　　　５番
暗清龍　　　　１５番
三相逄　　　　１０番
獨獨　　　　　　２番
莊　　　　　　　１番

共４８番，請指正。

＊　　　＊　　　＊　　　＊　　　＊　　　＊　　　＊

Leo: 我有d開摃問題… 唔清楚正式既規則, 想請教…
1. 暗摃算唔算門清?
2. 摃上摃係唔係補摃再補摃再自摸? 摃上自摸加幾番?
3. 開摃算唔算暗簡? (我地打就算, 因為始終要自己摸三隻)
4. 兩摃, 三摃計法又算唔算兩暗簡, 三暗簡

重有d般高問題…
一二三萬, 一二三萬, 一二三筒
係計一般高? 還是一般高再加姊妹? (2006.04.19)

Leo，有關開摃：
1. 暗摃算唔算門清?　算。
2. 摃上摃係唔係補摃再補摃再自摸?摃上自摸加幾番?　係/加1番。
3. 開摃算唔算暗簡?　我地都算。
4. 兩摃, 三摃計法又算唔算兩暗簡, 三暗簡?　與題3同理，算。

至於「一二三萬, 一二三萬, 一二三筒」，我地計一般高再加姊妹。

＊　　　＊　　　＊　　　＊　　　＊　　　＊　　　＊

強尼:交流下, 簡簡糊, 可唔可以摃?
瀝胡瀝胡中, 要加一暗簡, 咁呢簡可唔可以開摃呢? (2006.07.01)

我地打開，簡簡同瀝胡都唔可以摃。

＊　　　＊　　　＊　　　＊　　　＊　　　＊　　　＊

r: hello, 我路過都有野想問
想問下, 如果例如我已經叫糊, 等食147萬, 對家打4萬我唔食(想等人地打1萬做龍大d嘛), 咁跟住自摸 1萬, 食唔食得呢? THX (2006.08.01)

已經叫147萬，對家打4萬唔食，自摸1萬唔食得；
自己打1萬，繼續叫147萬，同一圈有人打147萬都唔食得；
又自摸1萬，都唔食得；
又再打1萬，繼續叫147萬，同一圈有人打147萬都唔食得；
又自摸1萬，都唔食得；
又再打1萬，繼續叫147萬，同一圈有人打147萬都唔食得；
又自摸1萬，都唔食得；
又再打1萬…
…
…之後，請放心…
…
…因為已經冇晒1萬…
…
…不過…之前應該已經嘔血死左…

＊　　　＊　　　＊　　　＊　　　＊　　　＊　　　＊

r: 我見你ref既其中一個page, 有一段話台面得返3隻牌, 所有人都不能槓碰上
呢個又係咪「各處鄉村各處例」呢 (2006.08.01)

末三張內不得碰上槓，我覺得都合理。因末三張可能可以數牌，若硬碰上槓，可以移動摸牌次序，又或者打隻牌出黎，硬唔比人摸牌；此例值得跟隨。

＊　　　＊　　　＊　　　＊　　　＊　　　＊　　　＊